Основачот на Facebook, Марк Закерберг, вчера по прв пат сведочеше пред Конгресот на САД, поради неодамна откриената злоупотреба на приватни податоци на корисници на оваа социјална мрежа. Во текот на одговарањето на прашањата на сенаторите, Закерберг во повеќе наврати истакна дека Facebook погрешил, но дека во иднина ќе реагира поинаку.
Закерберг истакна дека Facebook недоволно реагирал во случајот со компанијата Cambrdige Analytica, односно дека сега, кога би можел да го врати времето, тие би реагирале поинаку.
За потсетување, Facebook се соочува со жестоки критики откако беше објавено дека управата на компанијата со години знаела дека консултантската компанија Cambridge Analytica собира и користи податоци од околу 87 милиони корисници.
Тие податоци се користени за време на предизборната кампања за претседателските избори одржани во 2016 година.
Исто така, Закерберг истакна дека неодамна биле избришани околу 10.000 лажни профили кои се користени во политички цели, вклучувајќи го и руското влијание на минатите американски претседателски избори.
Закерберг одговараше и на прашањата зошто не се реагирало во заштитата на приватноста.
Според неговите тврдења, често станува збор за своевидна војна која се води меѓу вештачката интелигенција во рамките на Facebook и апликациите, профилот и оние кои ги купуваат податоците и имаат лоши намери. Тоа е случај, како што вели Закерберг, бидејќи луѓето не можат да следат толкава количина на податоци, односно дека во целиот тој процес мора да биде вклучена вештачката интелигенција.
Интересен момент од сведочењето, беше прашањето на еден од сенаторите околу тоа дали Закерберг сака да им открие во кој хотел моментално престојува, на што директорот на Facebook одговори со „не“.
Целта на сенаторот беше токму Закерберг, кој е обвинет за ноншалантно однесување кон приватните податоци на корисниците, на свој пример да покаже почит кон приватноста.
Директорот на Facebook во неколку наврати мораше да објаснува како оваа социјална мрежа функционира, како заработува пари, односно како располага со податоците на своите корисници. Исто така, во повеќе наврати Закерберг не знаеше да одговори, префрлувајќи ја тежината на прашањата на „својот тим“, кој во краток период би ги доставил одговорите до Конгресот.
Покрај случајот со Cambridge Analytica, на Закерберг му беше поставено и прашањето зошто Facebook доцнел во спречувањето на ширење на омраза во случајот со геноцидот во Мјанмар.
Закерберг одговараше и на прашања околу приходот на компанијата во однос на корисниците.
Имено, Закерберг, призна дека поголемиот дел од корисниците не го читаат договорот кој мора да се прифати при креирање на профил. Сенаторите алудираа на тоа дека Facebook на луѓето им нуди премногу правни термини кои се неразбирливи за обичниот човек.
Поединечни сенатори изразија сомневање во тоа дека Facebook самостојно ќе ја поправи својата политика, односно побараа поголема контрола, нагласувајќи дека компанијата на Закерберг и слични платформи на неа, би требало да бидат контролирани преку надворешна агенција, која би се воспоставила со нов закон.
