Костадин Захов зимава дојде во охридскиот клуб и веднаш ја доби капитенската лента. Но, откри и дека при потпишувањето на договорот сопственикот на клубот побарал нешто од него...
Голманот на Воска Спорт има големо куп искуство. Во двете финалиња со неговиот поранешпен клуб Шкендија, од каде зимава се пресели на бреговите на Охридското Езеро, има и две титули. Да не ги заборавиме и оние 5 како освојувач на 1.МФЛ, од кои 3 со Шкендија и 2 со Вардар.
„Очекувам добар натпревар. Тиквеш е квалитетна екипа, играат офанзивен фудбал и заслужено се тука. Ние исто така имаме свои очекувања од натпреварот за титула. Многу е поинаку од моите претходни искуства во вакви натпревари. Веројатно и многу поголем предизвик. Ова е млад клуб, нема притисок, испишуваме историја. Веројатно за мене ќе биде многу полесно да се игра ова финале отколку претходните. Се надевам дека ќе успееме да стигнеме до пехаро“, изјави Захов.
Кога во јануари по потрага по минутажа Захов од Шкендија се пресели во дебитантот во првата лига, чија цел сезонава беше да избори опстанок во македонската елита, веројатно не ни помислил дека на крајот ќе се бори за уште еден пехар во својата богата колекција.
„Кога дојдов во Охрид тимот веќе беше во полуфиналето, а газдата на клубот ми рече: 'Од тебе чекам да ни ја донесеш куп титулата'. Еве сме сега тука, толку блиску. Но, треба и да се одигра финалето на најдобар можен начин“, додаде 36-годишниот голман.
Воска Спорт е клуб формиран во 2019 година и пласманот во куп финалето е огромен успех за овој тим. Во својот пат во првата лига освои титули шампион на 3.МФЛ Југозапад и на 2.МФЛ.
Тиквеш и Воска Спорт куп финалето ќе го одиграат утревечер од 19 часот на Националната Арена „Тодор Проески“ во Скопје. Билетите се веќе во продажба преку MKTickets, а на денот на натпреварот ќе може да се купат и на билетарницата на стадионот.
