Потпретседателот на Интер Хавиер Занети изјави дека проблемот со Мауро Икарди е решена работа и дека веќе во мечот со Лацио аргентинскиот напаѓач би требало да се најде во стартната постава.
Икарди ќе се врати на тренинзи со Интер по повеќе од еден месец, а иако меѓу клубот и Аргентинецот имаше многу проблеми во врска со продолжувањето на договорот, главната причина за отсуството беше повредата на коленото.
На Икарди во меѓувреме му беше одземена капитенската лента, поради што тој и неговата сопруга и менаџерка Ванда бурно реагираа, но на крај очигледно ја прифатиле одлуката на клубот.
Тренерот на Интер Лучано Спалети во моментов има големи проблеми во нападот со оглед на тоа дека и другиот напаѓач Лаутаро Мартинез е повреден, па можно е Икарди да се најде во првата постава уште на мечот против Лацио и повторно да го предводи нападот на својата екипа.
„Проблемот меѓу Интер и Икарди е решен. Сега е најважно да се фокусираме на тимските цели. Оваа приказна е завршена, многу беше кажано досега и треба да преминеме од зборови на дела. До крајот на сезоната имаме уште 10 натпревари и мора да се држиме заедно за да ги исполниме целите, а пред сѐ тоа се однесува на пласманот во Лигата на шампиони. Во недела играме против директен конкурент и сигурно нѐ очекува напорен натпревар“, рече Занети.
Икарди последен пат на тренинг со тимот беше на 13 февруари, а последен пат играше во дресот на Интер на 2 февруари против Парма. Оттогаш поради повреда на коленото беше на пауза.
