Необичната дрвена статуа на првата дама на САД Меланија Трамп, која се наоѓа во близина на нејзиниот роден град во Словенија, е запалена, а потоа и отстранета, пренесуваат медиумите.
Бред Дауни, американскиот уметник кој ја направи оваа скулптура вели дека истата е уништена на 4 јули, на Денот на независноста на САД.
Полицијата покрена истрага за овој случај, пренесува агенцијата Reuters.
Чудната скулптура за која повеќето велат дека личи на Штрумфета од цртан филм отколку на Меланија Трамп, предизвика различни реакции кај јавноста откако беше поставена во Севнице во 2019 година.
Дауни за Reuters рече дека би сакал да знае кој ја вандализирал оваа статуа и со која намера го сторил тоа.
Канцеларијата на Меланија Трамп не дала коментар за овој чин.
Во изминативе недели, претседателот Доналд Трамп истакна дека ќе биде побарана одговорност од секој кој уништува американски историски споменици.
Меланија Трамп е родена и израсната во Словенија. Дошла да работи во САД како манекенка во 90-тите и така го запознала претседателот Доналд Трамп. Дозволата за постојан престој во земјата ја добила како „имигрант со извонредни способности“, позната како „Ајнштајнова виза“.
