Заврши опсадата на Мариупол, украинските војници се евакуирани од челичарницата Азовстал и дел од нив со руски автобуси се префрлени во болница, пренесе BBC.
Повеќе од 200 мажи се одведени во друг град, кој е под руска контрола. Целиот процес на преговори со Русите се одвивал во тајност. Изгледа дека ОН и Црвениот крст се вклучени во евакуацијата, што објаснува зошто Украинците прифатиле да бидат одведени на руска територија.
Во вечерното обраќање, украинскиот претседател Володимир Зеленски изјави дека постои само еден приоритет, а тоа е спасување на војниците.
„На Украина ѝ требаат живи хероите“, рече тој.
Не се познати многу факти за украинските војници кои беа под опсада во Азовстал, ниту што ќе се случи со нив. И двете страни, без сомнеж, ќе се обидат да ја претстават ситуацијата како лична победа – Русија бидејќи конечно ја доби контролата над овој град и Украина бидејќи војниците успеаја долго време да дадат отпор и да останат живи, пишува BBC.