И покрај јавните апели, и покрај силните реакции од јавноста, вклучително и од земјоделците, претседателката Гордана Сиљановска-Давкова ги потпиша штетните измени на Законот за урбанистичко планирање, обвинуваат од здружената иницијатива Зелен хуман град.
„Нејзиниот потпис ги произведе следните последици:
❌ неповратно уништување на плодно земјоделско земјиште заради изградба на фотонапонски централи и ветерници;
❌ одобрувањето на урбанистичките проекти за централи и ветерници кои се од 'стратешки интерес' стана дискреционо право на еден човек – министерот за транспорт;
❌ за градбите од државно и локално значење ќе има смешни 15 дена за забелешки од јавноста кои нема задолжително да влијаат врз спроведувањето на урбанистичкиот проект – а и прашање е во кој скриен агол од службените веб-страници ќе се објавуваат информациите;
Сумирано, Сиљановска со својот потпис овозможи своеволност во работењето на министерот за транспорт и на градоначалниците со што го попречи правото на пристап до правда за прашања што силно влијаат врз животите на жителите на Македонија“.
Тие потсетуваат и на неодамнешната изјава на претседателката Сиљановска: „И како човек и како претседателка верувам дека вреди да се бориме за правото, правдата и моралот. Да изградиме општество во кое секој ќе има шанса за пристоен и достоинствен живот, ранливите – поддршка, а младите – инспирација, мотив и иднина. Имаме насушна потреба од еколошка правда и договор со природата, но не како наметната обврска, туку како предуслов за извесна иднина“.
„Сиљановска своевремено како пратеничка беше дел и од т.н. Зелена парламентарна група, но од делата од позиција на моќ за одлучување се гледа вистинската посветеност на еден систем на вредности и искреноста во борбата за подобро утре за сите нас.
Уништувањето на македонското земјоделско земјиште како ресурс за сметка на создавање енергетски монополи е еден од најнепатриотските чинови што една власт може да му го приреди на својот народ!
Апелираме до сите локални активистички групи каде што има рурални делови да се самоорганизираат будно да ја следат работата на локалните самоуправи, но и на Министерство за транспорт и врски. Оваа година се локалните избори – самоорганизирајте се и за почеток кандидирајте се во локалните совети!
Граѓаните мора да ги преземат работите во свои раце, во спротивно ниту ние ниту нашите деца ќе имаме иднина во Македонија!“, порачуваат од Зелен хуман град.
