Украинскиот претседател Володимир Зеленски и неговите воени команданти одлучија да продолжат да го бранат источниот град Бахмут, кој руските сили и платениците на Вагнер со месеци очајно се обидуваа да го освојат.
Информацијата за средбата на Зеленски со командантите на украинската армија се наведува во соопштението испратено од кабинетот на украинскиот претседател.
„На средбата детално се разговараше за ситуацијата во Бахмут“, се вели во соопштението и се додава: „Учесниците се договорија да продолжат со одбранбените операции и дополнително зајакнување на нашите позиции во Бахмут“.
Покрај Зеленски и воените команданти, на средбата беа и шефот на кабинетот на претседателот Андриј Јермак, шефот на военото разузнавање Кирило Буданов, украинскиот премиер Денис Шмихал и генералниот секретар на Советот за национална одбрана и безбедност Олексеј Данилов.
Да потсетиме дека руските сили напредуваат во обидите да го освојат Бахмут. Денеска има информации за жестоки борби во и околу градот. Американскиот секретар за одбрана Лојд Остин неодамна се обиде да ја омаловажи важноста на Бахмут, велејќи дека неговиот пад нема „да биде оперативна или стратешка пречка“ за украинската војска.