Украинскиот Kalush Orchestra победи на синоќешното финале на Евровизија во Италија со песната благодарение на бранот јавна поддршка што придонесе за емотивната победа, која ја поздрави и претседателот Володимир Зеленски.
Отпеана на украински јазик, победничката песна го комбинираше рапот со традиционалната народна музика и беше почит на мајката на фронтменот на бендот, Олех Псиук.
Обложувалниците ја претставија групата како јасен фаворит за годишното натпреварување, кое обично привлекува околу 200 милиони гледачи, делумно врз основа на популарните симпатии кон Украина по руската инвазија во февруари.
Украинскиот претседател Володимир Зеленски брзо ја честиташе победата.
„Нашата храброст го импресионира светот, нашата музика ја освојува Европа! Следната година Украина ќе биде домаќин на Евровизија“, рече тој во онлајн пораката.
Победниците традиционално ќе бидат домаќини на настанот следната година, како што сега беше Италија откако победи лани.
„Им благодарам на Kalush Orchestra за оваа победа и на сите оние кои ни ги дадоа своите гласови! Сигурен сум дека звукот на победата во борбата против непријателот не е далеку“, додаде тој.
Зеленски најави и дека Украина наредната година, исто така во мај, ќе ја организира Евровизија во разрушениот Мариупол, кој според неговите планови дотогаш треба да биде обновен. Ова е треба победа за неговата земја.
„Третпат во својата историја, и верувам дека не е последен. Ќе се потрудиме еден ден да ги примиме учесниците и гостите на Евровизија во украинскиот град Мариупол. Слободен, мирен, реконструиран“, наведе Зеленски.
Украина беше на четвртото место според гласањето на жирито, но победата ја однесе со водечка предност во гласањето на гледачите. Британецот Сем Рајдер заврши на второто место, додека Шанел од Шпанија заврши трета.
