Во Албанија забележан е нов црн рекорд на позитивни случаи со COVID-19 во едно деноноќие.
Според Министерството за здравство и социјална заштита, од направените 546 тестови позитивен резултат е добиен кај 130 од нив, што е највисока бројка досега од почетокот на пандемијата во првите денови на месец март.
Албанската метропола продолжува да биде главно жариште на болеста. Од последно потврдените нови случаи над половина или 72 се токму од Тирана, каде се и половина од активните случаи или 1.404 лица.
Во исто време во списокот на оздравени внесени се 23, а починале четири лица.
И понатаму загрижува постојаното зголемување на лицата, на кои им е неопходно болничко лекување. Во Инфективната клиника и болницата „Шефќет Ндроќи“ позната како болница Ковид 2, се третираат 116 пациенти од кои 30 во тешка здравствена состојба.
Во Албанија до сега направени се 43.203 тестови, позитивен резултат е добиен кај 5.750, битката со опасниот вирус ја добиле 3.054, а ја изгубиле 176 лица.
Во изминатите 24 часа, во Грција е регистриран рекордно висок број на нови случаи на COVID-19, 121, од кои само пет се од направените тестови на влезните точки во земјата, според официјалните податоци од Националната организација за јавно здравје, а зголемен број новозаразени (25) има и на Кипар.
Според грчките медиуми, од денешните нови случаи, 47 се во Солун, 26 во Атика, поширокиот регион на Атина, осум во Лариса, седум на островот Крф, како и по еден или два новозаразени во различни делови на Грција.
Од почетокот на епидемијата регистрирани се вкупно 4.855 случаи.
Со оглед на тоа дека во изминатата седмица драстично започна да се зголемува бројот на нови случаи во Грција, заменик-министерот за цивилна заштита Никос Хардаљас и професорот епидемиолог и шеф на надлежната комисија во Министерството за здравство Сотирис Циодрас, попладнево одржуваа вонредна прес конференција.
Зголемен број нови случаи во изминатите 24 часа се регистрирани и на Кипар. Министерството за здравство соопшти 25 новозаразени, со што бројот на позитивни случаи од почетокот на епидемијата се зголеми на 1.180 лица.