Уште тела се извлечени од под урнатините на зградата во близина на главниот индиски финансиски центар Мумбај, со што вкупниот број на загинати денеска се зголеми на 20, соопшти локалната полиција.
Трикатната станбена зграда во густо населената населба Биванди се урна вчераутро, додека станарите сѐ уште спиеле.
Се проценува дека кога се срушила зградата, која локалните медиуми ја нарекуваат „зграда на смртта“, внатре имало повеќе од 60 станари.
„Меѓу загинатите има девет деца“, изјави претставникот на локалната полиција, Малоји Шинде.
Спасувачката операција продолжува со помош на Националните сили за помош при катастрофи (НДРФ).
„Најмалку уште 20 лица е можно сѐ уште да се наоѓаат заробени во урнатините“, изјави официјален претставник на НДРФ.
Локалната полиција соопшти дека зградата била стара околу 40 години, а се шпекулира дека била прогласена за недоволно безбедна за живеење и била наредена евакуација, но дека станарите не се иселиле навреме.
Ваквите несреќи, за жал, не се ретки во Индија, а причините најчесто се неквалитетната и неправилна градба, материјалите со низок квалитет и лошите временски услови, како поројните дождови кои предизвикуваат свлекување на земјиштето.
