Жените им го должат на другите она што секој човек му го должи на секој друг човек: свесност за нивната заедничка човечност.
Длабоко вкоренетите стереотипи за родот и социјалната хиерархија, особено во патријархалните општества како нашето, ја отежнуваат позицијата на жената во речиси секоја сфера на постоењето. Жената е предмет на стереотипни изјави и етикети и од мажите, и од жените, особено кога не зборуваме за жена во „традиционалната“ смисла, туку ги опфаќаме и транс жените и лицата кои се чувствуваат како жени. Жената е често сведувана на нејзините улоги во светот доминиран од мажите, со што се негираат интерални делови на нејзиниот идентитет.
Има многу работи кои жените не ги должат никому, ни на мажите, ниту на другите жени.
Жените не ви должат да бидат „женствени“.
Жените не ви должат да се насмевнуваат кога им се обраќате.
Жените не ви должат да се дотеруваат или да не се дотеруваат.
Жените не ви должат да се шминкаат или да не се шминкаат, ниту да даваат објаснување зошто го прават или не го прават тоа.
Жените не ви должат да раѓаат деца.
Жените не ви должат да имаат, чуваат или воспитуваат деца.
Жените не ви должат да имаат мајчински инстинкт.
Жените не ви должат да сакаат (само) мажи.
Жените не ви должат да ги привлекуваат (само) мажи.
Жените не ви должат да сакаат или да ги привлекува некој воопшто.
Жените не ви должат долги коси.
Жените не ви должат совршено мазни тела.
Жените не ви должат нежност.
Жените не ви должат сила.
Жените не ви должат да се облекуваат на одреден начин на одредена возраст.
Жените не ви должат да се однесуваат или облекуваат на каков било начин кога се мајки.
Жените не ви должат да бидат тивки.
Жените не ви должат да бидат гласни.
Жените не ви должат чист дом и зготвен ручек.
Жените не ви должат објаснувања за нивните животни избори.
Жените не ви должат објаснувања зошто сакаат или не сакаат да работат.
Жените не ви должат објаснувања како напредувале во работата.
Жените не ви должат да носат фустани и здолништа.
Жените не ви должат да не носат фустани и здолништа бидејќи „не им доликува“ на годините/типот на градба/професијата.
Жените не ви должат одговори на прашања на кои не сакаат да одговорат.
Жените не ви должат секс.
Жените не ви должат објаснување зошто ве одбиле.
Жените не ви должат благодарност за нивното место во светот.
