Женската сила и убавина низ фотографското око на Ерина Богоева

По повод Меѓународниот ден за елиминација на насилство врз жените, македонската фотографка Ерина Богоева за Kajgana.com направи избор на портрети од кои зрачи женската сила и убавина.

„Жените не смеат да живеат во страв од своите партнери. Ниту едно насилство - нити физичко, нити психичко - никогаш не е оправдано и не смее да биде прифатено како нормално однесување. Ние сме тие кои треба да го кренеме гласот против тоа насилство, а институциите треба да послушаат. Еманципацијата на жените е нешто за кое што ќе се борам со секое свое дело и на уметнички, и на личен план“, изјави Богоева.

Ерина Богоева е добитничка на наградата „13 Ноември“ за 2019 година за монографијата „Скопје – Архитектурата како фотографска скулптура (1963 ‒ 1990)“, која е во издание на „Арс Либрис“, дел од „Арс Ламина – публикации“. До 2018 година има остварено четири самостојни изложби: „Животот на улиците на Европа“ како дел од програмата на Денот на Европа и во рамки на серијата „Културни приказни" на ЕУ Инфо Центарот на Делегацијата на ЕУ во Скопје; „Небото над Скопје“, во склоп на манифестацијата „Бела ноќ“, во Скопје; „Четири годишни времиња и малку љубов“ е нејзина прва продажна изложба во кафулето „Вондерлуст“ (Wanderlust) во Скопје, додека изложбата „Затемнетиот град“ во Музејот на современата уметност во Скопје е поддржана од програмата „Нов културен бран“ на Министерството за култура на РМ.