Конзорциумот City Football Group, кој е сопственик на Манчестер Сити, ќе мора да го намали својот удел во шпанскиот прволигаш Жирона со цел каталонскиот клуб следната сезона да се натпреварува во Лигата на шампионите за прв пат во својата историја, објави УЕФА.
Жирона е 47% во сопственост на City Football Group од 2017 година.
На почетокот на сезоната во Жирона беа убедени дека ги следат правилата на УЕФА бидејќи конзорциумот од Емиратите нема мнозински удел.
Но, според писмото од Телото за финансиска контрола на клубовите (ЦФЦБ) на УЕФА, доволно е субјектот „да поседува 30% или повеќе од капиталот на клубот или правата на глас“, или дури и само 10% ако е негов главен акционер.
За да можат Манчестер Сити и Жирона да се натпреваруваат заедно во Лигата на шампионите, City Football Group ќе мора да го намали својот удел во каталонскиот клуб до 3 јуни, крајниот рок што го постави УЕФА.
Со цел да се избегне избрзана продажба на акции, што би била и економски неповолна, писмото на ЦФЦБ сепак им нуди на клубовите привремена опција, ограничена на претстојната сезона: трансфер на акции во фонд за доверба без права на инспекција, под контрола на УЕФА.
Минатата година, истото правило за повеќекратна сопственост доведе до три случаи против Тулуз и Милан, Астон Вила и португалска Виториа, како и Брајтон (Англија) и Унион Сен Жилоа (Белгија).
УЕФА конечно ги затвори трите досиеја по „значајните промени“ во тие клубови за да го ограничи влијанието на нивните инвеститори.
