Напаѓачот на Милан е изненаден што Јувентус не е во игра за Скудетото и поради тоа вели дека донел правилна одлука кога го одбил клубот од Торино и заминал во Лондон.
Репрезентативецот на Франција летоска му се приклучи на Милан од редовите на Челси, но една година порано лесно можел да заврши во Јувентус.
Тогашниот предводник на „Старата дама“, Андреа Пирло, сакал да го донесе летото 2020 година, но Оливје Жиру одбил за да остане во Челси.
„Одлучив да останам бидејќи имав карти в рака и сакав да ги одиграм. Со оглед на тоа како заврши сезоната, ја донесов правилната одлука“, рече Жиру говорејќи за Il Corriere dello Sport.
„Сините“ таа сезона ја освоија Лигата на шампионите, па тек потоа Жиру замина во Милан.
„Росонерите“ в недела вечер ќе се сретнат токму со Јуве, а Жиру е изненаден од фактот што Јувентус не е во игра за врвот на табелата.
„Немаа добар почеток на сезоната, што не значи дека не се силни. Признавам, сметав дека ќе се борат за титулата. Без разлика на заминувањето на Роналдо, имаат талентиран тим. Нивниот офанзивен плејмејкер Пауло Дибала е клучен играч и шампион“.
„Јувентус сѐ уште е меѓу најдобрите клубови во Италија, се наоѓаат во добар моментум и мора да им се спротивставиме на најдобар начин. Искусни се и ќе биде грешка доколку ги потцениме“, предупредува Французинот.
Во ова дерби Милан влегува после изненадувачкиот пораз од Специја во кој судијата Марко Сера направи огромна грешка кога го пресече голот за 2:1 на Милан, досудувајќи фаул наместо да почитува предност.
„Му се гледаше во лицето дека беше вознемирен. Се извини, но за жал вакви работи се случуваат. Моравме да победиме, а загубивме. Фрустрирачки е, но и ние носиме вина. Можевме да постигнеме втор гол, а сега треба фрустрацијата да ја претвориме во мотивација за да одиграме одлично против Јуве“.