По омаложувачките зборови испратени од напаѓачот на Реал Мадрид, се јави и прозваниот Оливје Жиру кој врати мило за драго.
„Не може да споредувате Ф1 со картинг. Дури и сум нежен со зборовите“, рече пред некој ден Бензема опишувајќи го Жиру и споредувајќи го со него.
Нормално, се очекуваше одговор и од Жиру. Напаѓачот на Челси во интервју за Befoot мудро му врати на Бензема, исмевајќи го дека тој стана светски шампион со Франција, а Бензема не беше во составот.
„Викаат дека не може да се споредува Формула 1 со картинг, а јас на таа тема можам само да кажам дека јас сум светски шампион. Тоа и не е така лошо за еден картинг“, рече Жиру.
И покрај тоа што Жури беше воглавно резерва кај Арсенал, а истата судбина ја доживува и во Челси, тој и натаму ја има довербата од францускиот селектор Дидје Дешан и редовно е дел од репрезентацијата. Досега има 97 настапи и 39 голови.
Бензема, проба малку и да се извади за споредбата, иако остана на ставот дека е подобар од Жиру: „Видете, доколку бев прашан за Роналдо, тогаш тој ќе беше формулата, а јас картингот“. Сепак, и ова остава простор за дискусија бидејќи Бензема направи споредба со пензионираниот Луис Назарио де Лима Роналдо, а не со Кристијано Роналдо. Дали самобендисаниот Карим мисли дека Португалецот не е подобар од него?