Откако нема туристи, градот е почист и потивок, велат жителите на Амстердам.
Неколку недели откако беше потврден првиот случај на коронавирус во Холандија прогласија карантин и ги затворија сите кафулиња и училишта.
Жителите велат дека надвор владее мир и спокој, а градот никогаш не бил почист. Имено, во последните 10 години Амстердам го посетуваа скоро 9 милиони туристи годишно.
„Празнотијата ја откри вистинската убавина на овој град; поминував на црвено светло на семафорот со мојот велосипед и без проблеми се движев низ сите улици кои пред пандемијата беа полни со туристи“, вели Катја Брук.
Ева де Вос живее блиску до плоштадот „Дам“ и вели дека пред нејзината куќа секој ден поминувале околу 300.000 луѓе.
Од друга страна пак, велат дека е штета што се затворени повеќето продавници, музеи, кафулиња.
„Амстердам повеќе не е Амстердам. Многу продавници се затворени. Ми недостасува живот на улиците. Сакам да се вратат туристите, но добро би било да се во помал број“, вели Де Вос.
