Сме виделе секакви морски чудовишта, но ова е секако едно од најморничавите. Имено, во близина на јапонскиот остров Авашима, нуркачите на камера фатија застрашувачки предатор.
Праисториската ајкула, попозната како ајкула-наметка (Chlamydoselachus anguineus), нормално живее на длабочина поголема од еден километар, но сега доплива малку поблиску и успеале да ја снимат со камера одблиску.
Ова животно, инаку, се верува дека е предок на денешните ајкули, а се појавило пред дури 80 милиони години.
Таа се смета за жив фосил поради нејзиниот примитивен изглед, како суштество од праисторијата. Со своето издолжено тело слично како на јагула со сплескана глава, оваа ајкула малку личи на другите ајкули. Разликата е најзабележлива во положбата на устата: наместо од долната страна, устата е сместена напред на главата. Овен тоа, додека повеќето денешни ајкули имаат 5 чифта прорези за жабри, ајкулата-наметка има 6, секој со набрчкан раб. Нејзините мали заби исто така се необични, секој има 3 остри шилци.
Забележано е дека оваа ајкула плива со отворена уста, покажувајќи ги своите забележливи заби, што довело до претпоставката дека забите дејствуваат како мамка за пленот. Оваа ајкула живее во длабока вода близу до морското дно, но повремено доаѓа на површината. Се храни со длабокоморски риби и со лигни. Мажјаците на стомакот имаат два долги миксиптеригии, со чија помош во текот на парењето се пренесува спермата во женката. Овој вид е ововивипарен, што значи дека младите се изведуваат од јајцата во мајката, која потоа коти живи младенчиња. До 12 младенчиња се котат и по 2 години по оплодувањето. Со лов на други длабокоморски видови, често случајно се фаќаат и овие ајкули-наметки. Со оглед на тоа дека овој вид толку ретко се размножува, тој е многу чувствителен и се наоѓа на Црвената листа на загрозени видови на МСЗП, наведена во категорија Речиси загрозен вид.
