Наука

Живот на друга планета не е опција, да ѝ помогнеме на Земјата - тврди нобеловец за астрофизика

15. октомври 2019 - 10:40 | А.С.

Добитник на Нобелова награда за астрофизика смета дека човештвото треба да се фокусира на решавање на проблемите на планетата Земја, а не да бара живот или услови за живот на друга планета.

Мајк Мејор и неговот колега Дидие Квелоз, исто така добитник на оваа престижна награда, во 1995 година ја открија првата егзопланета која има сличен потенцијал за развој на живот како на Земјата.

Тие пресметаа дека таа се наоѓа на иста оддалеченост како и Земјата од нејзината ѕвезда што е како нашето Сонце и сметаат дека таму најверојатно има вода.

Оттогаш, човековото знаење за егзопланетите почна нагло да расте. Со помош на софистицирана опрема како Транзитниот сателит за истражување егзопланети на НАСА (TESS) беа утврдени повеќе од 4.000 потенцијални егзопланети.

Меѓутоа, Мејор вели дека ова положување надежи во свет надвор од нашиот Сончев Систем е „глупава идеја“.

„Ако зборуваме за егзопланети, нештата треба да бидат јасни: нема да мигрираме. Овие планети се премногу далеку“, вели тој.

Мејор додава дека и во најоптимистичниот случај на планета која не е предалеку, на пример оддалечена неколку десетици светлосни години, животот таму не е опција. Дури и таа би била предалеку.

„Зборуваме за патување од стотици милиони денови, користејќи ги средствата што ни се достапни денес. Мора да ѝ помогнеме на нашата планета Земја“, порача нобеловецот.

Климатските промени го забрзуваат темпото, се сголемува емисијата на штетни гасови, се зголемува нивото на морињата, ледените површини се топат побрзо од кога било, предупредуваат експертите од Светската метеоролошка организација.

Во извештајот на оваа организација се наведени климатските промени и нивните влијанија во изминатите пет години кои се сметаат за петте најтопли во историјата.

Коментирај