„Кралевите“ имаа мизерна вечер среде Мадрид доживувајќи неочекуван пораз од Алавес, а згора на тоа се повреди и Еден Азар.
Ниту стратегот Зинедин Зидан не можеше да си објасни како се случи синоќешниот пораз, трет сезонава во Ла Лига и втор овој месец.
„Немам објаснување. Вечерва мешавме добри со лоши периоди. Кога постигнаа гол по само пет минути игра, работите станаа комплицирани за нас“.
Во средата Реал на сличен начина славеше против Интер на гости, со гол од пенал во 3. минута. Само неколку дена подоцна, истото сценарио се повтори, но овој пат не во корист на мадриѓаните.
„Пред неколку дена во Милано одигравме навистина добар натпревар, а сега... Тоа е реалноста, нашата реалност. Мора да продолжиме да работиме, да ни се опорават играчи и да ја промениме динамиката. Немаме конзистентност“, вели Зидан.
На прес-конференцијата Зизу беше прашан како ќе им помогне на играчите да ја пронајдат таа конзистентност, на што тој не сакаше да открие.
„Морам да најдам решение заедно со играчите. Нема да го соопштам вака. Не смееме да мислиме негативно, треба да погледнеме и каде одигравме добро и да се обидеме да бидеме конзистентни“.
Да биде бељата поголема, по само 28 минути игра Еден Азар мораше да биде заменет поради повреда.
Лукас Перес донесе водство за Алавес во 5, минута од пенал, а во 49. Хоселу зголеми на 0:2. Реал Мадрид гол за утреха постигна на 4 минути пред крајот преку Каземиру.