Францускиот стручњак Зинедин Зидан со победа го почна вториот мандат на клупата на Реал Мадрид откако се врати во клубот по неполна година, а со неговото враќање ситуацијата во екипата значително се подобри.
Така, Зидан уште во првиот меч им даде прилика на Марсело, Иско и Навас кои под Солари беа ставени целосно во втор план, а тој исто така рече дека се надева дека играчите на Реал Мадрид на вистински начин ќе ги одиграат останатите десет натпревари во Ла Лига.
„Само во првото полувреме имавме одредени потешкотии, што е сосема нормално, а во второто нѐ понесе публиката и во таа атмосферат играчите добро играа. Среќен сум за победата бидејќи во фудбалот најважно е да победувате. Натпреварот против Селта беше предизвик за нас и морам да кажам дека ми е особено драго што Иско постигна гол. Останаа уште десет натпревари во сезоната и се надевам дека ќе ја завршиме на вистински начин“, рече Зидан.
Французинот потоа објасни зошто на првиот натпревар по враќањето на клупата на Реал ги стави Навас, Марсело и Иско во првата постава и уште еднаш покажа каков џентлмен од човек е.
„Сакам Кејлор Навас да се чувствува важен, го ценам Куртоа кој покажа дека е одличен голман, но не заборавам што направи Навас за нашиот клуб. Не играше многу во последно време и сакам тоа да се смени, истото е и со Марсело и со Иско. Никој не смее да заборави што направија овие играчи во дресот на Реал Мадрид и јас сметам на сите нив“, рече Зидан.
Реал Мадрид ја победи Селта со 2:0. Првиот погодок го постигна Иско на асистенција на Бензема, а вториот Гарет Бејл на кого му асистираше Марсело.
