По новиот неуспех на Реал кој синоќа едвај се изваде од пораз во Менхенгладбах, стратегот Зинедин Зидан призна дека сезонава нема да биде воопшто лесна за негвиот тим.
Реал Мадрид можеби го совлада најголемиот ривал Барселона во саботата и тоа на „Камп Ноу“, но и во 2. коло од Лигата на шампионите остана без победа.
Не само што не победија, туку „Кралевите“ беа пред пораз и со два гола во самиот финиш успеаја да го освојат првиот бод на гостувањето кај Борусија. Да, првиот бод, бидејќи во 1. коло загубија дома од Шахтар.
„Не очекувавме дека ќе има ваква драма, но мојот тим покажа дека знае како да се справи со ситуацијата. Мислам дека бевме доста добри во првото полувреме. Она што нѐ боли е што направивме сериозна грешка која нѐ чинеше првиот гол“, рече Зизу по натпреварот.
Губењето 2:0 до 87. минута и на крајот освојувањето на бод Французинот го гледа позитивно. Два пораза во првите две кола од Лигата на шампионите ќе беше голем шок за Реал.
„Поседот на топка не успеавме да го претвориме во шанси за гол. Она што ќе го земеме како позитивно од овој натпревар е начинот на кој играчите се повратија. Многу беше важно да се освои овој бод“.
Има уште 4 кола до крајот на фазата по групи, а Реал веќе наредниот вторник го чека нов дуел во ЛШ и тоа против главниот конкурент за првото место, тимот на Интер.
„Ова ќе биде тешка година за сите, но јас сум горд на мојот тим за натпреваров. Ако продолжиме да играме вака дефинитивно ќе ја поминеме групата“, уверен е Зидан.
