Барселона синоќа забележа нова победа и со тоа направи чекор напред кон освојување на нова титула во домашното првенство. Но, тоа не му прави никаква разлика на Зинедин Зидан, кој и понатаму смета дека Реал Мадрид е супериорен во однос на каталонскиот ривал.
Оваа сезона тргна лошо, а завршува уште полошо за Реал Мадрид. Две тренерски смени, лоша форма на играчите и испаѓање од борбата за сите титули кои беа во игра сезонава – тоа се резултатите од хаотичните осум месеци кои ги преживеа „кралскиот клуб“.
Без разлика на тоа што Барселона се наоѓа на врвот на табелата, со 12 бодови предност во однос на Атлетико Мадрид и 16 бодови предност пред Реал Мадрид, сепак луѓето од таборот на „кралскиот клуб“ се убедени дека нивниот клуб и понатаму е најпрестижниот претставник на Ла Лига.
„Ла Лига е многу важна за нас, исто како и за навивачите. Трофејот од домашното првенство е приоритет бр. 1 за наредната сезона“, изјави Зинедин Зидан, тренерот на Реал Мадрид.
Тој смета дека реномето на Реал Мадрид е задржано и покрај лошата сезона. Според Зидан, Реал Мадрид продолжува да биде најголемиот клуб во Шпанија, а добрата сезона на Барселона не направила доволно за да го загрози приматот на „кралскиот клуб“.
„Ние имаме 33 титули во Ла Лига. Колку има Барселона? Точно е дека им оди одлично во изминатите неколку години и мора да си го признаеме тоа. Но, нашата историја брои многу повеќе титули“, додаде Зидан.
Пред Реал Мадрид се наоѓа бурно лето, кога во фокусот ќе бидат ставени трансферите кои клубот ќе ги направи со цел да го засили составот за следната сезона. Се споменуваат трансфери на неколку нови играчи, како Еден Азар, Н’голо Канте и Нејмар, но како што стојат работите, неколку играчи би можеле и да го напуштат клубот. На големо се пишува за заминувањето на Герет Бејл, Маријано Дијаз, па дури и Кејлор Навас, кој иако беше дел од составот на Зидан при освојување на Лигата на шампионите, сепак е значително постар од неговиот колега и ривал за првотимското место на голманската позиција, Тибо Куртоа.