Франција и Италија играа во големото финале на Мундијалот 2006 во Германија, финале кое останува запаметено по многу работи, меѓу кои и паненката на Зизу против одличниот Буфон.
Французите во 7. минута добија удар од белата точка откако аргентинскиот судија Орасио Елисондо оцени дека Марко Матераци го фаулирал Флоран Малуда во казнениот простор. Топката ја зеде во тој момент најдобриот играч во светот, Зинедин Зидан, а против него на гол-линијата беше најдобриот голман во светот, Џанлуиџи Буфон.
Популарниот Зизу ги остави сите без здив кога навидум ладнокрвно изведе папенка удар, топката удри во пречката и падна зад линијата, со што ги доведе „Ле Блу“ во водство.
Но, паненката сепак воопшто не била планирана. Зизу имал други намери кога се сетил на еден факт. Тоа се приметува и во самиот удар, кој е премногу силен за паненка. Зидан за малку не го промаши пеналот.
„Немав намера да го изведам ударот на тој начин, требаше да шутирам десно од голманот, како и обично. Во последен момент, додека се приближував кон топката да го изведам ударот, се сетив дека Буфон играше против мене во Италија и знаеше како обично изведувам пенали, па решив да го сменам правецот на ударот во паненка во последната секунда!“
Вака Зидан го прокоментира тој пенал, сметајќи го тоа што го направи како нешто обично. Тоа беше само топка која во последен момент го смени курсот, и навистина Зидан беше во право, додека Буфон се фрли на неговата десна страна.
Додека ние го гледаме како нешто речиси нереално што тој би шутирал против Буфон на таков начин во финале на Светско првенство, тука лежи генијалноста - правењето на едноставна работа што другите ја гледаат како незамислива.
Зидан го измами светот со тој удар, а како можеше кутриот Буфон да знае каде ќе шутира Зидан ако самиот Зидан не знаеше до последната секунда пред да ја допре топката.
Италијанците потоа израмнија преку Матераци, а Зидан финалето неславно предвреме го заврши, со црвен картон во 110-тата минута. Натпреварот дојде до изведување на пенали, а „Аѕурите“ славеа со 5:3 и станаа светски шампиони.
