Шведскиот напаѓач Златан Ибрахимовиќ играше во најголемите лиги во светот и притоа собра огромен број трофеи. Но, оној што му недостасува е трофејот од Премиер лигата, каде се задржа само една сезона и веднаш стана фаворит на навивачите на Манчестер Јунајтед.
Ибра откри дека квалитетот на Премиер лигата е онаков како што мислел дека е пред да потпише за Манчестер Јунајтед – преценет.
Откако си замина од родната Шведска, каде ги бранеше боите на Малме, Златан Ибрахимовиќ помина четири сезона во Холандија, седум сезони во италијанската Серија А, четири сезони во Франција и една сезона во шпанската Ла Лига, а во тој период освои вкупно 12 лигашки титули. А во 2016 година, кога Швеѓанецот имаше 34 години, реши да направи трансфер во Англија, каде му се приклучи на тимот на Манчестер Јунајтед.
„Премиер лигата беше токму онаква каква што мислев дека е. Имаше многу возбуда и неизвесност, темпото беше многу брзо, но квалитетот не беше ништо посебно. Ако не можеш да го издржиш темпото и интензитетот, тогаш нема да преживееш. Ама од технички аспект, лигата е преценета“, изјави популарниот Ибра.
Во единствената сезона во Премиер лигата тој успеа да постигне 17 гола на 28 натпревари и вели дека искуството на играње во дресот на Манчестер Јунајтед е нешто што навистина сакал да го доживее. Веднаш потоа Ибрахимовиќ замина во САД, каде и ден денес го носи дресот на Лос Анџелес Галакси
„Не жалам што не останав повеќе време во Премиер лигата, туку жалам што не дојдов во Англија 10 години порано. Уште повеќе ми е жал за навивачите, кои пред една деценија ќе имаа шанса да видат потполно различен ѕвер“, додаде Ибрахимовиќ.
Легендарниот Швеѓанец откри дека сериозно размислувал да направи трансфер во Англија во 2011 година, откако несогласувањата помеѓу него и Пеп Гвардиола излегоа на виделина додека тој играше за Барселона. Сепак, решил да се врати во Италија, каде знаел дека ќе биде повторно среќен и ќе ужива во фудбалот.