Ибрахимовиќ најави заминување од Милан бидејќи очигледно неговите амбиции со оние на клубот се разликуваат.
„Ибра или игра за да освои нешто или останува дома“, почнува Златан Ибрахимовиќ во интервју за реномираниот италијански спортски весник La Gazzetta dello Sport.
„Ми рекоа дека пензионирањето во Америка е премногу лесно, па се вратив во Милан. Тука сум чисто поради страст бидејќи јас практично играм беспари. Потоа оваа корона ситуација запре сѐ и си помислив дека, можеби, нешто пробува да ми каже дека треба да се пензионирам“, открива тој.
„За среќа, се вративме на терен. Потоа се јавија проблемите со задниот лист, но по два дена веќе бев спремен да се вратам во тимот. Таков е Ибра. Но, тие ми рекоа да не брзам“.
Поради повредата Ибрахимовиќ ги пропушти првите три натпревари по рестартот на сезоната, полуфиналето од Копа италија против Јувентус и лигашките дуели со Лече и Рома.
Милан тргна одлично забележувајќи 4 победи и реми во петте натпревари од Серија А. Но тоа е доволно само за борба за 5. место и директен влез во групите од Лига Европа, второкласното европско натпреварување.
„Ибра се роди за да игра фудбал и сѐ уште е најдобар во тоа. Ќе видиме како ќе се чувствувам за два месеца. Ќе видиме и што ќе се случува со клубот. Ако ситуацијата е ваква, да бидам искрен, тешко дека ќе ме видите во Милан наредната сезона. Ибра не е играч за Лига Европа, а и Милан не е клуб кој припаѓа таму“, искрен е Швеѓанецот кому уграњето во Лига Европа не му е по ќеф.
Милан не може во Лигата на шампионите, па тоа значи дека Ибра веројатно ќе си замине од таборот на „Росонерите“.
„Не знам дали ќе има друг клуб после Милан, никогаш не сакам да затворам врати за иднината. Би одел само некаде каде што би имал малку контрола, не каде што зборовите не вредат ништо“.
