Напаѓачот на Милан вели дека не е вратен во репрезентацијата на својата земја поради неговото име, туку бидејќи со своите игри заслужува повик.
Златан Ибрахимовиќ веќе наполни 39 години, а не бил репрезентативец од 2016 година кога сам се повлече. Но, се најде на последниот список на селекторот Јане Андерсон за мундијалските квалификации на крајот од месецов.
„Не сакам да бидам земан предвид и викан за она што го имам направено порано, туку поради она кое можам да го дадам во моментов“, рече Ибра говорејќи за официјалниот YouTube канал на Шведската фудбалска федерација.
„Не можам да бидам играчот кој бев пред 5, 10, 15 или 20 години. Сега имам тотално поинаква физика и тотално поинаква игра“, додава тој.
„Но, и натаму се држам на високо ниво. Не грижете се. Не сум во репрезентацијата бидејќи моето име е Златан и бидејќи сум Ибрахимовиќ. Таму сум поради она кое можам да го дадам за тимот и искуството. Мислам дека го заслужив повикот“.
Шведска на 25 март ги отвора мундијалските квалификации дома против Грузија, а три дена подоцна гостува кај Косово. Потоа на 31 игра пријателски натпревар дома со Естонија.