Претераното вежбање може да му наштети на вашиот фитнес напредок и да го зголеми ризикот од повреди, особено ако сте почетник, вели светскиот рекордер во powerlifting, Крис Дафин, за Insider.
Незабележувањето напредок, проблеми со расположението или спиењето и постојаната болка се само некои од сигналите дека премногу вежбате и дека е време да ја забавите или промените вашата рутина.
Вежбате напорно, но нема напредок
Кога ќе престанете да гледате напредок, јасно е дека сте отишле предалеку. Ако поминувате часови во теретана и нема подобрување, не им давате соодветен одмор на вашите мускули за да можат да се зајакнат.
Не можете да завршите вежба или да подигнете иста тежина како порано
Ако не го слушате вашето тело, може да почнете да губите од тешко заработената сила. Дафин вели дека прекумерното вежбање може да предизвика замор на мускулите до тој степен што сте премногу исцрпени за да ја завршите вежбата. Време е да ја намалите тежината или бројот на сетови.
Вашето расположение или квалитетот на спиењето се влошени
Ненапредувањето може да ве исфрустрира, а лошото расположение е исто така знак на исцрпеност. Ако губите сон затоа што чувствувате болка навечер, време е за пауза, вели Дафин.
Вашиот опсег на движења или форма се влошени
Друг показател за исцрпеност е ако болката или заморот ја ограничуваат вашата мобилност. На пример, можеби нема да можете да правите длабоки сквотови како порано или правилно да ги држите теговите.
Чувствувате болка или имате повреди што не поминуваат
Долготрајната болка е знак за прекумерно тренирање и не треба да ја игнорирате. Ако претерате, намалете го интензитетот додека не закрепнете. Ако имате повреда или сериозно ограничен опсег на движење, можеби е најдобро целосно да го прекинете тренингот.
По пауза од вежбање, важно е постепено да се вратите за да го намалите ризикот од повторна повреда, заклучи Дафин.