На изненадување на многу филмски љубители, денеска беше најавено дека култната хорор-комедија „Zombieland“ ќе добие продолжение во 2019 година, и тоа со истата актерска екипа од првиот дел.
На крилја на успехот на нивниот последен проект „Deadpool 2“, сценаристите Рет Рис и Пол Верник најавија дека продолжението на „Zombieland“ ќе пристигне во киносалите некаде кон крајот на наредната година.
Џеси Ајзенберг, Ема Стоун, Абигејл Бреслин и Вуди Харелсон ќе се вратат во „Zombieland 2“, каде повторно ќе се борат со опасностите кои ги носи зомби апокалипсата во САД. Оригиналниот филм беше огромен хит и со продукциски буџет од само 23,6 милиони долари успеа да заработи преку 100 милиони долари на светскиот боксофис.
Во очи на десетгодишнината од филмот, најавено беше дека неговото продолжение ќе почне да се снима на почетокот на наредната година.
„Имаме информација која не можеме сега да ја откриеме, но знајте дека на оние кои се надеваа дека ќе имаат шанса да го гледаат ‘Zombieland 2’ желбата ќе им биде исполнета набрзо“, рече Пол Верник.
„Zombieland“ стана култен кај фановите на хорор-комедии поради остриот и мудар хумор, но и покрај топлата приказна за четворица аутсајдери кои пробуваат да се снајдат заедно во свет во кој и не е многу останато.