Корисниците кои ја користат апликацијата Zoom почнаа да забележуваат појава на реклами.
Zoom започна пробен период на прикажување реклами на корисниците кои бесплатно ги користат неговите услуги. Рекламите се прикажуваат во прелистувачот по завршувањето на разговорот и се видливи по разговорот чиј домаќин е друг Basic корисник. Тестирањето за рекламирање е ограничено на одредени земји.
Компанијата ја промени својата политика за приватност за да биде компатибилна со новитетот. Zoom нема да користи содржини од состаноци, вебинари и разговори за маркетинг, промоција и рекламирање од трета страна.
Рекламните партнери би можеле да користат колачиња за да ја следат активноста на корисниците на веб-страницата на Zoom, но тие можат да бидат блокирани преку алатката за управување со колачиња на Zoom.
Zoom очекува рекламната програма „да му овозможи да поддржува инвестиции и да продолжи да им обезбедува на бесплатните Basic корисници пристап до робусна платформа“.
Basic корисници можат да учествуваат на неограничен број состаноци, но се ограничени на 30 минути повици еден на еден и 40 минути групни состаноци. Исто така, тие немаат никаква cloud услуга за складирање на снимки од состаноци или пристап до опции како што се транскрипти.
Zoom стана клучна алатка за милиони корисници откако почна масовно да се работи од дома поради пандемијата на коронавирусот. Многумина го избраа бесплатниот план бидејќи нуди солидни карактеристики.
Затоа, не треба да е чудно што Zoom сега почна да се врти кон реклами, кои барем засега не се наметливи и ја почитуваат приватноста на корисниците.
