Постојат повеќе причини поради кои сме уморни иако сме по цел ден дома во текот на самоизолација. Многумина се борат и со несоница во овој период.
Анксиозноста и промената на рутините се причини поради кои луѓето имаат проблем со спиењето. Дури и оние кои немаат проблеми со спиењето можат да чувствуваат умор повеќе од вообичаено. Науката за ова има одговор.
Докторката Дајана Гал смета дека е сосем нормално ако забележите пад на енергијата кога не правите нешто. Колку помалку сте активни толку поуморни се чувствувате и тогаш сте уште повеќе неактивни и така во недоглед.
„Кога ви недостигаат физички активности и поголем дел од времето го минувате во иста позиција, седечка или лежечка, на вашето тело му се намалува можноста за вдишување кислород и забележувате голем пад на нивото на енергија и мотивација“, вели д-р Гал.
Покрај намалената физичка активност, помалку кислород доаѓа до крвта и нивото на умор се зголемува, што доведува до зголемена нервоза.
Докторката предлага секој ден да правите вежби како истегнување за да дозволите кислородот да стигне до крвта.
Ако работите од дома таа советува да правите почести паузи за истегнување. Наместо гледање телевизија правете нешто што го стимулира мозокот, како решавање крстословки.
Исто така, многу е важно да јадете што повеќе овошје и да пиете течности. Хидратацијата има голема улога во работата на мозокот, како и во подигањето на енергијата.
