Marvel против DC e една од најзанимливите современи дебати. Фановите на двете компании постојано се во замислена борба, додека и Marvel и DC имаат повеќе од солиден успех на боксофисот со нивните филмови.
Иако ликовите на двете компании излегоа од стриповите, сепак тие се многу повеќе познати како суперхероите на нашето време кои се појавуваат во филмски блокбастери.
Одговорот на прашањето „Која од овие две компании е подобра?“ можеби никогаш нема да го добиеме, но засега гледаме дека, барем на филмското платно, ликовите на Marvel се многу поуспешни од оние на DC Comics. Почитуваниот сценарист Марк Милар верува знае зошто Marvel имаат поголем успех кај публиката од нивните ривали.
„Мислам дека е многу едноставно, ликовите на DC Comics се тешки за претставување во филм. Го кажувам ова како огромен DC фан, бидејќи Superman, Batman и Wonder Woman ми се омилените ликови од стриповите. Ликовите на DC не се базираат на нивниот таен идентитет, туку на нивните супермоќи, и тоа не е толку интересно за публиката. Од друга страна, ликовите на Marvel имаат многу интересни тајни идентитети и публиката останува позаинтересирана со приказната на Питер Паркер, Тони Старк и Мет Мурдок, отколку за Spiderman, Iron-Man и Daredevil“, рече Милар.
Марк Милар рече дека не сака да биде погрешно разбран, и дека Batman е еден од најинтересните ликови кои се појавиле на филмското платно, но дека само тој е адутот на DC во оваа „битка“.
„Можеби луѓето ќе ме критикуваат поради ова, но сметам дека доказот е пред нас. На филмовите на DC работеа многу способни луѓе, режисери, актери, сценаристи, но резултатот е секогаш ист и неуспешен“, заврши Милар.
Тој рече и дека не смета дека е невозможно да се направи добар филм за суперхерој на DC Comics, но дека за тоа студиото ќе треба многу да се потруди.
Следниот филм од филмскиот универзум на DC треба да излезе оваа година во декември и се работи за „Aquaman“, каде во главната улога се појавува Џејсон Момоа.
