Дали ви се чини дека оваа пролет кивате и шмркате повеќе од вообичаено? Не сте сами.
Според американскиот Центар за контрола на болести (CDC), 30 отсто од светската популација страда од алергии на полен, кои предизвикуваат симптоми на поленска треска или алергиски ринитис. Ако чувствувате дека симптомите на алергијата ви се влошиле во последно време, не фантазирате: од 1990 година, истражувачите забележале зголемување на количината на полен во воздухот за 21 процент.
Best Life контактираше со д-р Шјам Џоши, шеф на Одделот за алергија и имунологија и медицински директор на Клиниката за алергија и имунологија на Универзитетот за здравје и наука во Орегон, за да открие што се крие зад промената. Тој вели дека неколку клучни фактори предизвикуваат пораст на алергиите и забележува дека постојат начини за борба против симптомите.
Џоши вели дека главната причина за честите алергии се климатските промени.
„Во текот на изминатите неколку децении, климатските промени доведоа до подолги сезони на опрашување и поголем волумен на полен. Ова главно се должи на намалениот број на денови со мраз секоја зима и зголемувањето на CO2 во воздухот, што доведува до посилен циклус на опрашување за растенијата“, вели тој за Best Life. Најголем пораст на полен е забележан во Тексас и во средниот запад на САД, додава Џенифер Буржоа, фармацевтски и медицински специјалист во SingleCare.
Всушност, студија од 2022 година објавена во списанието Nature Communications покажа дека покрај промените предизвикани од емисиите на CO2, промените во температурата и врнежите можат да ги зголемат годишните емисии на полен за 16 до 40 проценти. Дополнително, промената на земјината покривка – што значи трансформација на природните живеалишта во урбани средини – ја менува и дистрибуцијата на емитери на полен, велат истражувачите.
Џоши додава дека покрај промените во околината кои ги зголемуваат шансите за алергии, вашето тело може да стане и поподложно на алергии.
„Иако основната причина не е целосно разбрана, се смета дека промените во исхраната и микробиомот може да придонесат“, вели тој. „Сето ова заедно веројатно објаснува зошто многу луѓе од година во година имаат потешки симптоми на алергија.“
