Фино е кога пиеме со друштвото, но тоа што се случува потоа станува полошо како што стареете. Зошто мамурлакот е полош во однос на периодот кога сте биле помлади?
Постојат неколку причини за тоа.
„Станува збор за последица од директно делување на алкохолот во телото, како и на начинот на кој вашето тело го метаболизира алкохолот и се ослободува од него“, вели д-р Хедер Модеј за livestrong.com.
Обично мамурлакот се појавува како последица од пиење прекумерни количини алкохол, но зависно и од тоа што пиете, во комбинација со вашата генетика, тежина, целокупното здравје, па дури и со полот. Мамурлак може да доживеете и по консумирање мала количина алкохол.
Вашиот црн дроб не функционира ефикасно како претходно
Задачата на црниот дроб е да го метаболизира алкохолот што го пиеме, но како што старееме, способноста ефикасно тоа да го врши се намалува.
„Ова би можело да биде предизвикано со фактот дека едноставно има помал проток на крв до црниот дроб, што значи дека на телото му треба повеќе време да го исфрли алкохолот“, вели д-р Хишам Кора, специјалист по психијатрија и медицина за детоксикација во Њупорт Бич, Калифорнија.
Пиете лекови
Алкохолот во нашиот организам е оптоварување за црниот дроб, исто како и лековите.
„Како што старееме, имаме помалку активности на ензимите во црниот дроб така што земањето лекови истовремено со пиење алкохол создава дисбаланс за тие ензими“, вели д-р Сима Бонеј, директорка на Центарот за борба против стареење во Филаделфија.
Консумирањето алкохол во текот на земањето одредени лекови исто така може да ве изложи на ризик од развој на сериозни здравствени состојби, бидејќи алкохолот пречи на разградување на лековите: седативите стануваат посилни, лековите за крвен притисок не се толку ефикасни, а разредувачите на крв може да го зголемат ризикот од сериозно крвавење.
Вашите мамурлаци можеби се само привидно полоши
„Со оглед на тоа дека веројатно пиете помалку отколку кога сте биле млади, вашето сеќавање на минатите мамурлаци може да биде искривено“, вели д-р Кора.
Можеби некогаш мамурлаците биле еднакво брутални како оние кои и сега ги доживувате, но со оглед на тоа што повеќе не се редовни во вашиот живот и повеќе не сте навикнати на нив, ги доживувате потешко.