Благодарејќи на светските трендсетери и секако, на хипстерите, брадата стана нов моден симбол кој покажува дека сте „ин“. Мажите кои се доволно среќни да можат да имаат цврста и густа брада ја носат со гордост. Но, зошто некои мажи не можат да пораснат брада?
На добар дел од машката популација им растат само по неколку влакна тука и таму, па тие и да се одлучат да пуштат брада, изгледаат несредено и непотполно.
Ако на таквите мажи им треба некаква утеха, тогаш добро е да знаат дека постои научна причина поради која различни мажи имаат различна количина на брада. Тоа се должи на хормонската хемикалија наречена дихидротестостерон.
Таа е накратко наречена DHT, често е поврзувана и со ќелавоста, а е поврзана со тестостеронот во машкото тело. Тоа не значи дека ако имате повеќе тестостерон ќе имате и повеќе брада. Може да имате повеќе тестостерон од Џејсон Стејтам, но ако тестостеронот не се претвори во DHT, нема да ви порасне брада.
DHT е модифицирана, поактивна форма на тестостерон. Во човечкото тело, тестостеронот се трансформира во DHT, што предизвикува посилни ефекти од самиот тестостерон.
Сѐ зависи од тоа како вашето тело реагира на тестостеронот. Ако сте почувствителни на него, брадата ќе ви биде поцврста и погуста, и обратно. Исто така, голем дел во целата работа има и генетиката. Ако вашиот татко имал лоша и ретка брада, можете да му се заблагодарите нему за слабите гени и помалото лачење на DHT.
„Некои животни мерки можат да влијаат на цврстината на брадата, како и на хормоналниот баланс. Можете да пробате да вежбате повеќе, пробајте да изгубите тежина, намалете ја количината на алкохол која ја внесувате или тотално исфрлете го алкохолот и јадете повеќе здрави маснотии: јаткасти плодови, масло од кокос и маслиново масло“, вели доктор Тори Куремада-Зиога, специјалист за опад на коса и хирург.
