Вежбате речиси секој ден, но пак не гледате резултати од сето тоа препотување. Понекогаш нашите навики на вежбање, а и животните навики, ни стојат на патот кон остварување на нашите фитнес цели.
Вежбате без план
Првиот чекор е да отидете до теретана. Но што откако ќе стигнете таму? Не ви треба скап личен тренер кој ќе работи исклучиво со вас, но сепак треба да знаете што и кога вежбате. Раговарајте со поискусните во теретаната, истражете малку на интернет, запознајте го своето тело и неговите можности и потреби. Ако само трошите енергија и време, а не гледате резултати, вежбањето за кратко ќе ви стане фрустрација наместо сатисфакција. Затоа, направете неделен и месечен план и држете се до зацртаните цели.
Сакате со вежбање да надоместите за лошата исхрана
За жал, тоа не е возможно. Ако редовно јадете брза, мрсна и нездрава храна или не јадете ништо цел ден, па се прејадувате попладне или доцна навечер, вежбањето нема да ја надомести штетата. Или барем не долгорочно. Не може со дупло вежбање денес да ги избришете трагите од вчерашниот дупли чизбургер. Исто така, прегладнувањето нема да ви помогне побрзо да ослабите или да формирате мускули. На телото му се потребни хранливи и здрави оброци за да го издржи напорниот тренинг и да ви ја даде енергијата што ви е потребна. Здравите прехранбени навики се неизоставен дел од здравиот начин на живот, покрај редовното вежбање.
Повеќе сте фокусирани на мобилниот отколку на вежбањето
Фокусот е важен дел од ефикасноста на добриот тренинг. Ако само одите во теретана за да поминете час-два таму и да се чекирате, да направите фотки и слично, џабе одите. Само им пречите на оние кои навистина сакаат да вежбаат.
Мобилниот телефон е голема пречка и може да ви го уништи тренингот. Супер е за да слушате музика или да го следите вашиот напредок преу некоја од фитнес апликациите. Меѓутоа, ако очите и мислите ви се на малиот дисплеј наместо на вежбањето или трчањето, не вежбате правилно, а може и да се повредите. Додека трчате на трака или правите вежби за нозе не е време да си пишувате на чет, да твитате или да гледате смешни видеа. Фокусирајте се на тренингот и оставете го правењето селфи на огледало за откако ќе постигнете резултати со кои може да се пофалите.
