На децата им е потребна постојана нега и грижа од едниот или двајцата родители, односно старатели. Кога тие не се во можност да бидат со нив, потребно е да бидат под надзор на одговорно лице.
По инцидентот што ја потресе домашната јавност во изминатите денови – наоѓањето на две малолетни деца сами во заклучен автомобил во скопската населба Ново Лисиче – одново се актуелизира темата околу опасноста од оставањето на децата сами во заклучен автомобил.
Опасноста е значително поголема ако автомобилот е оставен на сонце, во услови на високи температури на воздухот, но независно од временските услови, оставањето на децата во затворен автомобил може да биде опасно, па дури и фатално.
Истражувањата покажале дека дури и во поладни летни денови, температурата во затворен автомобил може да се качи над 52 степени Целзиусови.
Децата се почувствителни на топлина и затоа дури и паркирањето на автомобилот во сенка и оставањето на подотворени прозорци не гарантира дека нема опасност по нивното здравје и добросостојба.
По 60 минути поминати во затворен автомобил, телесната температура може да достигне 38 степени Целзиусови, да дојде до хипотермија, потење и голема жед. Во овие услови, на детето веќе му е непријатно и тешко.
По 90 минути телесната температура може да се зголеми на 39 степени, поради што потењето се засилува, се јавува црвенило на кожата и се зголемува бројот на срцеви отчукувања. Голема е веројатноста за појава на грчења кај децата кои имаат епилептични напади.
По 150 минути во затворен автомобил во топол ден, телесната температура се искачува на 40 степени и може да дојде до онесвестување, дехидратација, слабост, повраќање, отежнато дишење.
Ако автомобилот е со темна боја, загревањето се случува уште побрзо.
По 170 минути поминати во затворен автомобил на топло време, телесната температура достигнува 41 степен Целзиусов, се јавува силна главоболка, вртоглавица, збунетост, халуцинации и делириум. Во оваа состојба итно е потребна медицинска помош.
Ако го оставите детето во затворен автомобил кога надвор е облачно, со температура на воздухот од околу 24°C, во рок од 40 минути детето ќе биде препотено, жедно и изложено на ризик од хипотермија. Во автомобил со темна боја на каросеријата, тоа може да се случи за 35 минути.
