Покрај тоа што вниманието го привлекува поради својот петти настап на Светските првенства во својата играчка кариера, 39-годишниот Рафаел Маркез, специфичен е и поради тоа што на тренинзите на мексиканската репрезентација не носи идентична опрема како и своите соиграчи, чии тренинг маици се исполнети со спонзорски симболи.
Поврзаност со мафија
Американското министерство за финансии во текот на изминатата година го стави Рафаел Маркез на црната листа, поради сомневање дека е поврзан со мексикански нарко картел.
Некогашниот дефанзивец на Барселона и Монако, кој објави дека ќе се пензионира по завршувањето на Светското првенство во Русија, ги негираше обвиненијата.
Иако официјална постапка против него не е започната, целокупниот имот на Рафаел Маркез во САД е замрзнат, како и имотот кој го има во Мексико, а е поврзан со американски компании.
Бројни забрани
На американските компании им е забрането да склопуваат договори со мексиканскиот репрезентативец, се додека тој се наоѓа на црната листа.
Рафаел Маркез на тренинзите на мексиканската репрезентација не смее да носи опрема, на која стои марката Coca-Cola.
Ако биде избран за играч на натпревар на Мундијалот, признанието нема да смее да го прими, бидејќи наградата ја претставува марката Budweiser.
Изјавите пред или после натпревар, не смее да ги дава пред паното на кое се испишани официјалните спонзори на Светското првенство, како Coca-Cola и McDonalds.
Му беше забрането и да дојде во Русија користејќи ги услугите на американските авиокомпании.
Во досегашниот дел од групната фаза на Светското првенство во Русија, Маркез забележа само 38 минути: 16 минути против Германија и 22 минути против Јужна Кореја.
За мексиканската репрезентација вкупно забележа 144 настапи, а на вечната листа пред него се само Клаудио Суарез (179 настапи), Андреш Гуардадо (148 настапи), Павел Пардо (148 настапи) и Герардо Торедо (146 настапи).
