Верувам во феминизмот како движење што се бори за еднакви права на мажите и жените. Феминизмот што ми треба не знае за супериорност.
Гордо се идентификувам како феминистка бидејќи верувам дека борбата сѐ уште трае, бидејќи за пошироката јавност зборот „феминизам“ уште носи негативен предзнак, бидејќи верувам дека „феминизам“ не е лош збор.
Феминистка сум бидејќи имаме уште пат до преиспитување и соборување на патријархатот и неговите вредности кои сѐ уште мажоцентрично ги диктираат политиките.
Феминистка сум бидејќи верувам дека еднаквоста почнува од домот, каде треба исто да ги воспитуваме машките, женските деца и оние кои се чувствуваат понаку, да им ги овозможиме истите права, слободи и пристап до образование, работни места и управувачки позиции.
Феминистка сум бидејќи верувам во еднаквоста на луѓето, еднаквост што не познава пол, род, раса, националност, религија, сексуална ориентација, туку само луѓе.
Феминистка сум бидејќи верувам дека не треба да замижуваме и замолчуваме пред родово базираната неправда и насилство, без разлика на кој род припаѓаме. Насилство е насилство. Феминистка сум бидејќи случаи како „Јавна соба“ уште се влечат низ лавиринтите на службите наместо да бидат решени пред да настрадаат уште девојки и жени. Феминистка сум бидејќи и во општество соочено со случај како „Јавна соба“ ниту една јавна политичка личност, ни мажи, ни жени, не излегоа веднаш со осуда на делото и барање правда.
Феминистка сум бидејќи уште го користиме изразот „мажот помага“ во домашните обврски и воспитувањето на децата и тоа го сметаме за достигнување. Тоа е и негов дом и тоа се и негови деца.
Феминистка сум бидејќи сакам да гледам како расте бројот на мажи феминисти кои согледуваат колку е штетен патријархатот и со своите дела и постапки покажуваат дека не се сметаат за супериорни над жените или повредни од нив врз основа на полот. Феминистка сум за сите мажи кои ќе се побунат кога колешката која работи на иста позиција зема помала плата.
Феминистка сум бидејќи додека не ја избориме борбата за еднаквост меѓу мажите и жените, како ќе ја водиме борбата за еднаквост по други основи? Феминистка сум бидејќи не сакам да израсне уште една генерација деца кои не го добиле разбирањето, прифаќањето и негувањето на нивната различност.
Феминистка сум бидејќи уште владее менструална сиромаштија и нема бесплатни хигиенски производи достапни во училиштата, факултетите и на јавни места, додека расте „розовиот данок“ на „женски“ производи.
Феминистка сум бидејќи родово базираното семејно насилство се смета за „семеен проблем“, а не кривично дело.
Феминистка сум бидејќи ни се потребни повеќе жени донесувачи на одлуки бидејќи донесуваме одлуки за сите, вклучувајќи ги и жените.
Да, јас сум горда феминистка и верувам во еднаквост што ќе создаде еден поправичен свет. Како тогаш се разликувам од тебе?
