Тиквата е идеална и задолжителна есенска намирница што треба да ја вклучите во секојдневната исхрана. Богата е со лековити состојки, вкусна е и нема многу калории.
Научно е докажано дека содржи каротеноиди, заслужни за портокаловата боја, но и за многуте лековити својства на тиквата. Меѓу нив се алфа-каротен и бета-каротен, познати и како провитамини на витаминот А, бидејќи може да ги претвори во активен облик на витамин А.
Тиквата е одлична за исфрлање на вишокот вода од организмот, особено за луѓето кои страдаат од реума или воспаление на бубрезите. Дијабетичарите треба почесто да јадат тиква, како и луѓето со прекумерна дебелина. Одлична е и за оние кои имаат проблеми со желудникот и тенкото црево.
Меѓу зеленчукот, тиквата е еден од најконцентрираните извори на алфа-линоленска киселина, омега-3 масна киселина добра за здравјето на срцето. Оваа киселина се претвора во ЕПА, масна киселина со која изобилуваат рибите, а која ги намалува триглицеридите и спречува промени на ритамот на работата на срцето. Исто така, оваа киселина го намалува ризикот од појава на болести на срцето и кардиоваскуларниот систем.
Тиквата содржи 90 проценти вода, лесно е сварлива, а содржи и влакна. Одлична е за оние кои имаат проблеми со варењето бидејќи го поттикнува истото и така ги смирува воспаленијата на дигестивниот тракт. Овозможува подобро функционирање на црниот дроб и жолчката, содржи ензими кои ја разградуваат маснотијата во крвта.
Тиквата може да се консумира сирова, варена, печена или пржена. Покрај меснатиот дел, се користат и семките, кои содржат 30% протеини, до 38% масло, околу 5% смола, етерично масло, шеќер, пектин и ензими.
