Европската комисија го казни Apple со 1,8 милијарди евра поради кршење на законот за конкуренција поврзан со стримување на музика.
Apple ги спречил стриминг услугите да ги информираат корисниците за опциите за плаќање надвор од продавницата за апликации на Apple, соопшти Европската комисија. Комесарката за конкуренција, Маргрете Вестагер, изјави дека Apple ја злоупотребил својата доминантна позиција на пазарот веќе една деценија и ѝ нареди на американската компанија да ги отстрани сите ограничувања. Apple веќе најави жалба на оваа одлука.
Одлуката на Европската комисија беше донесена по жалбата на шведскиот сервис за стриминг на музика Spotify, кој беше незадоволен од ограничувањата и провизијата од 30% на Apple.
Вестагер рече дека Apple ги спречил „програмерите да ги информираат потрошувачите за алтернативни, попристапни музички услуги достапни надвор од екосистемот на Apple“.
„Според антимонополските правила на Европската Унија, тоа е нелегално“, рече таа.
Сепак, Apple не се согласува со овој став и најавува жалба.
„Одлуката беше донесена и покрај тоа што Европската комисија не најде веродостојни докази за штета на потрошувачите и ја игнорираше реалноста на просперитетен, конкурентен и брзорастечки пазар. Главниот поборник на оваа одлука е Spotify, компанија со седиште во Стокхолм, Шведска. Spotify ја има најголемата апликација за стриминг на музика во светот и се сретна со Европската комисија повеќе од 65 пати во текот на истрагата“, се вели во соопштението.
Од друга страна, Spotify ја поздравува одлуката, нарекувајќи ја „важен момент“ и „испраќа силна порака дека ниту една компанија, дури и монопол како Apple, не може да ја злоупотреби својата моќ и да контролира како другите компании комуницираат со нивните потрошувачи“.
Apple тврди дека Spotify не му плаќа провизија бидејќи ги продава своите претплати преку сопствената веб-страница, а не преку споменатата продавница за апликации.
Од Spotify велат дека ограничувањата одат во корист на музичкиот стриминг сервис Apple Music.
