Три интересни трансфери се случија на последниот ден од зимскиот преоден рок, кој на Стариот континент се затвора вечерва.
Мароканскиот крилен напаѓач Хаким Зијеш, кој импресионираше на Мундијалот во Катар, ги мина лекарските прегледи во ПСЖ и за реализација на трансферот се чека само Челси да ја прати потребната папирологија.
Со оглед на тоа што 29-годишниот Мароканец уште пред недела дена ги договори условите со ПСЖ, парискиот клуб се надеваше да ја избегне неизвесноста што ја носи последниот ден од преодниот рок, но сепак Челси малку ги одолговлечи работите пред конечно да го пушти. Со ПСЖ ќе потпише до 2025 година.
Арсенал успеа да го договори италијанскиот играч од средниот ред Жоржињо, кој доаѓа исто така од редовите на Челси. Овој трансфер беше договорен експресно брзо откако Арсенал на градскиот ривал му понуди 12 милиони фунти, кои „Сините“ веднаш ги прифатија.
31-годишниот италијански репрезентативец со бразилско потекло веќе ги мина медицинските прегледи, а со „Топчиите“ ќе потпише до 2024 гдоина. На големо се шпекулираше дека на лето ќе замине во Барселона, но Микел Артета, според англиските медиуми, бил многу убедлив во убедувањето да се пресели во друга населба од Лондон.
Минхенски Баерн се засили со португалскиот десен бек Жуау Канселу кој експресно си замина од Манчестер Сити по кавгата со Пеп Гвардиола. Тука не станува збор за трансфер туку за шестмесечна позајмица, но Баерн на лето ќе може да го откупи за 70 милиони евра.
Канселу уште синоќа пристигна во Минхен, ги мина лекарските прегледи, а денес стави и потпис на договорот. Ќе го носи истиот број што го имаше и во Сити - 22.
