Кошаркарите на Далас Маверикс ноќеска со победата на гости кај Лос Анџелес Клиперс од 123:93 дојдоа на чекор до пласман во полуфиналето од плеј-офот на Западната конференција.
Победата Маверикс ја извојуваа на крилјата на брилијантниот Лука Дончиќ, кој и покрај повредата на коленото одигра и го однесе тимот до многу важна победа за водство од 3-2 во партии, а се игра на 4 добиени натпревари.
Словенецот беше незапирлив за Клиперс и натпреварот го заврши со 35 поени, 10 асистенции и 7 скока, а остатокот од тимот рамномерно ги распредели поените. Така, Макси Клебер постигна 15, Кајри Ирвинг и Џејден Харди по 14, а Дерик Џонс и Дерек Лајвли по 12.
Кај тимот од Лос Анџелес најдобри со по 15 поени беа Ивица Зубац и Пол Џорџ, а вториот имаше и 11 скока.
На видеото по натпреварот се гледа како Дончиќ едвај оди поради повредата, а само накратко рече: „Уште една“.
Во другиот натпревар, Бостон Селтикс го совлада Мајами Хит убедливо со 118:84 и со тоа со вкупни 4-1 во четвртфиналната серија се пласираше во полуфиналето и го продолжи походот по шампионскиот прстен.
Со по 25 поени Дерик Вајт и Џејлен Браун беа најдобри кај Селтикс, додека Џејсон Тејтум имаше скромна вечер со 16 поени, но затоа се истакна во скокови (12).
Во полуфиналето Бостон го чека подобриот од серијата што ја играат Кливленд Кавалирс и Орландо Меџик, а моментално Кавалирс водат со 3-2.