Ограничувањето на цената на руската нафта повеќе не функционира, предупреди група западни осигурителни компании, истакнувајќи дека ограничувањето само поттикнало повеќе бродови да се приклучат на флотата која се обидува да ги заобиколи ограничувањата.
За да ги ограничи приходите на Москва за војната во Украина, Г7 постави ограничување на цената на руската нафта од 60 долари за барел, заканувајќи им се на превозниците и осигурениците со санкции доколку ги сервисираат поскапите барели.
Тие поставија и ограничување за нафтените продукти како што се бензинот и дизелот, од 45, односно 100 долари за барел.
Лимитот не ја постигна саканата цел бидејќи Русија почна да транспортира нафта со сопствена флота и бродови кои не се контролирани од Западот, предупреди во писмено соопштение Меѓународната групација на клубови за осигурување и задолжително осигурување.
Изјавата беше поднесена како писмен доказ денеска на сослушување во британскиот парламент. Во писмото групацијата наведува дека вклучува 12 осигурителни компании во поморскиот транспорт на товар кои покриваат 87 отсто од тонажата на светските океани.
„Заклучокот е дека станува речиси невозможно да се спроведе одлуката за ограничување на цената на нафтата бидејќи сè повеќе бродови и поврзани услуги учествуваат во паралелната трговија“, нагласи групата.
„Проценуваме дека околу 800 танкери веќе се повлекле од Меѓународната група на клубови, што е директна последица на воведувањето на горната граница за цената на нафтата“, додаваат оттаму.