На Лос Анџелес Лејкерс им претстои долго, топло лето и неизвесност со кои играчи ќе влезат во следната сезона. Дали Леброн Џејмс, кој овосезонскиот плеј-оф го заврши со 30 поени, 11 асистенции и 9 скока, сепак ќе биде во златниот дрес со број 23.
Откако Лејкерс ноќеска го претрпеа четвртиот пораз од Денвер Нагетс и се соочија со елиминација, по натпреварот Леброн не сакаше да зборува дали го одиграл последниот натпревар за Лејкерс и дали ќе ја продолжи кариерата.
„Немам одговор, искрено. Не размислував многу за тоа“, изјави 39-годишниот ветеран, кој не беше задоволен што беше најдобар играч на Лејкерс во серијата против актуелниот шампион, во која неговиот тим двапати беше поразен со кошевите на Џамал Мареј на истекот од времето.
„Не, не сум задоволен, бидејќи загубивме. Јас не сум тип која сака само да учествува. Загубивме и сега треба да видиме како можеме да бидеме подобри“.
Доколку реши да ја продолжи кариерата, Џејмс има две опции за следната сезона: да стане слободен агент и да бара нов клуб или да ја активира последната година од договорот со Лејкерс вреден 51,4 милиони долари.
Иако ова му беше 21 сезона во кариерата, тој покажа дека сѐ уште е способен да биде на врвот. Во регуларниот дел имаше просек од 25,7 поени, 8,3 асистенции и 7,3 скока, а на тоа ниво беше и во плеј-офот.