Кога беше објавено дека Мајк Тајсон и Џејк Пол ќе се борат на 20 јули во Арлингтон на стадионот AT&T, сите љубители на боксот ја дочекаа веста со голема доза на скептицизам.
Со оглед на тоа дека боксерскиот меч го организира Netflix, повеќето мислеа дека тоа ќе биде „популистичко шоу“, а дека борбата нема да биде од сериозен карактер.
Дури на почетокот се најавуваше и како егзибициски меч, но сега дојде до голем пресврт.
Последната професионална борба легендарниот Тајсон ја имаше на 11 јуни 2005 година кога беше поразен од Кевин Мекбрајд и се повлече со биланс од 50 победи и 6 порази.
По тој натпревар, Тајсон имаше борби со Кори Сандерс на 20 октомври 2006 година и со Рој Џонс Јуниор на 28 ноември 2020 година, но тие беа спроведени како егзибициски и не влегоа во неговиот официјален скор.
Борбата против Пол ќе биде и можност за Тајсон на 59-годишна возраст да ја забележи својата 51-ва победа во официјални борби.
Познатиот новинар Мајкл Бенсон најави дека борбата на 20 јули ќе биде професионална, и дека ќе биде 57-ма во Тајсон и 11-та во професионалната кариера на Пол.
Во моментот на борбата Тајсон ќе има 58 години, а Пол кој во професионалната кариера има 9-1 ќе има 27 години.
Тие ќе боксуваат осум рунди од две минути, наместо стандардните триминутни рунди карактеристични за машките професионални мечеви, и ќе носат ракавици од 14 унци кои се малку поголеми од стандардните што се гледаат во професионалните боксерски натпревари.