Ракус, мажјак од видот суматрански орангутан, се здоби со рана на лицето под десното око во борба со друг мажјак во Истражувачкиот центар Суак Балимбинг во заштитена прашумска област во Индонезија.
Она што го направи Ракус неколку дена подоцна го привлече вниманието на научниците, но и на љубителите на природата и животните.
Истражувачите велат дека забележале како Ракус ја лекува отворената рана на лицето со сок и џвакани листови од растение за кое е познато дека има антивоспалителни и аналгетски својства. Раната се затвори и зарасна за еден месец.
Ова е првпат животно во дивината да се види како лекува повреда користејќи билки.
„Колку што знаеме, ова е прв документиран случај на диви животни кои активно лекуваат рани со растителен вид со лековити својства“, рече вишиот автор на студијата Каролина Шупли, еволутивен биолог при Институтот.
Истражувачите рекоа дека самолечењето на орангутанот не изгледало како случајност.
„Се чинеше дека неговото однесување е намерно. Тој селективно ја третираше раната на десната страна на лицето со растителен сок и не ги третираше другите делови од телото. Однесувањето се повтори неколкупати, а подоцна нанесе и појак растителен материјал додека раната не беше целосно покриена“, објасни истражувачката Изабел Лаумер.
Орангутаните припаѓаат на групата големи мајмуни, заедно со шимпанзата, горилите и бонобоите. Орангутаните се најмалку поврзани со луѓето, но сепак споделуваат приближно 97 проценти од нивната ДНК.
Научниците велат дека таквото однесување можеби потекнува од заеднички предок што го делат луѓето и големите мајмуни.
