Актуелниот македонски шампион, ФК Струга, на три кола до крајот на сезоната се раздели со тренерот Шптим Дуро.
Стружани во изминатиот период играа во променлива форма, а вчера во 30. коло доживеаја пораз од Тиквеш во Кавадарци (3:2). Овој пораз му пресуди на албанскиот стратег Дуро, кој со клубот договорил спогодбен раскин на соработката.
„ФК Струга му се заблагодарува на Дуро за придонесот во периодот додека го водеше нашиот тим во домашното првенство и европските натпреварувања, му посакуваме и многу успеси“, стои меѓудругото во клупското соопштение објавено на Facebook.
Во последните три кола Струга, Шкупи и Шкендија влегуваат израмнети со по 58 бода. Струга до крајот прво го пречекува Гостивар в сабота, а потоа игра два крајно одлучувачки дуели против директните конкуренти Шкендија на гости и Шкупи дома.