Aitana (25) е првиот шпански модел создаден од вештачка интелигенција (ВИ). Создаден е да ги замени инфлуенсерите и моделите кои рекламираат одредени брендови.
Минатата година Рубен Крус, нејзиниот дизајнер и основач на агенцијата The Clueless, минувал низ тежок период бидејќи немал многу клиенти.
„Почнавме да анализираме како работиме и сфативме дека многу проекти беа ставени во мирување или откажани поради проблеми надвор од наша контрола. Честопати тоа беше вина на инфлуенсерот или моделот, а не проблем со дизајнот“, изјави Крус за Euronews.
Затоа решиле да создадат сопствен модел што ќе го користат за брендови кои ги бараат нивните услуги.
Така настанала Aitana, виртуелен модел која може да заработува и до 10.000 евра месечно, вели нејзиниот создавач. Сепак, нејзината просечна месечна плата е околу 3.000 евра.
„Го направивме тоа за да не зависиме од други луѓе кои имаат его, кои имаат манија или кои едноставно сакаат да заработат многу пари позирајќи“, вели Крус.
Заработува нешто повеќе од 1.000 евра по реклама, а неодамна стана заштитно лице на Big, компанија за спортска опрема, а на Fanvue прикачува и фотографии на кои е во долна облека.
За само неколку месеци Aitana успеа да добие повеќе од 121.000 следбеници на Instagram, а нејзините фотографии имаат илјадници прегледи и реакции. Таа дури добива и приватни пораки од познати личности кои не се свесни дека таа не е вистинска личност.
„Еден ден, познат латиноамерикански актер испрати порака поканувајќи ја да излезат. Овој актер има околу 5 милиони следбеници, а некои од нашиот тим ја гледаа неговата ТВ серија кога беа деца“, вели Крус.
Aitana била толку успешна што нејзините дизајнери веќе создале уште еден виртуелен модел наречен Maia, која е малку посрамежлива. Агенцијата е преплавена со барања од брендови кои сакаат свој персонализиран модел.
„Тие сакаат да имаат слика што не е вистинска личност и која ги претставува нивните вредности на брендот, така што нема проблем со континуитетот ако треба да отпуштат некого или не можат повеќе да сметаат на него“, вели Крус.
Сепак, иницијативата не помина без критики. Многумина се загрижени дека нереалното совршенство на моделот може да влијае на помладата генерација да стане опседната со постигнување такво совршенство.