Реал Мадрид доживеа неочекуван пораз од Атлетик Билбао и беше елиминиран од Купот на кралот со гол во 89. минута.
Не играше повредениот Карим Бензема, како и Лука Јовиќ, Гарет Бејл и Еден Азар кои седеа на клупата цел натпревар, иако се очекуваше барем еден од нив да го замени Французинот во игра.
Карло Анчелоти во еден момент дури и го испрати Азар да се загрева, тој истрча, но тренерот на „кралевите“ го врати на клупа.
Тоа го насмеа Бејл, кој седеше веднаш до Лука Јовиќ.
Многумина тоа го коментираа како понижување, иако Анчелоти по мечот се правдаше дека не е така.
„Поради замор го заменив Крос со Камавинга. Имав право на повеќе измени и планирав да ги искористам во продолженијата. За жал, (противниците) постигнаа гол доцна и немав време да ги извадам другите играчи“, изјави Анчелоти по елиминацијата.
Анчелоти беше прашан и дали Србинот, Белгиецот и Велшанецот биле обележани и казнети поради некоја причина.
„Немам што да кажам за тоа. Зошто ме прашувате за нив, а не за Себаљос или Карвахал? Нема ништо. Донесов одлуки кои не ги вклучија нив. Треба да ме прашате за Себаљос и Ваљехо, кои исто така не одиграа ниту една минута“, изјави Анчелоти.
Наводно Анчелоти го спречил Јовиќ да си замине од Реал, а сепак не му дава реална шанса. Иако овој натпревар се чинеше дека е вистинската прилика.
