Фудбалската кариера на Гарет Бејл и официјално е завршена, а очекувано неговата голф кариера допрва започнува и Велшанецот во иднина ќе се обиде да се наметне во овој спорт.
Поранешната ѕвезда на Реал Мадрид и Тотенхем потврди дека ќе учествува на турнирот AT&T Pebble Beach Pro-Am, а со него се очекува учество и на други познати личности и врвни светски професионалци во овој спорт, што воедно ќе биде одлична можност за Бејл да се покаже во најдобро издание.
„Пресреќен сум што можам да објавам дека ќе играм на AT&T Pebble Beach Pro-Am на почетокот на следниот месец! Одиме“, изјави Бејл.
Љубовта на Бејл кон голфот е одамна позната, а во својот дом има терен за голф со три дупки. Ова конкретно хоби, сега нов спорт, често му беше критикувано во текот на неговата фудбалска кариера бидејќи не беше максимално фокусиран на клупските тренинзи и обврски.
Така, кога го носеше дресот на Реал Мадрид, за време на натпревар за репрезентацијата на Велс, позираше со транспарент на кој пишуваше „Велс, голф, Мадрид. По тој редослед“, што предизвика бурни реакции кај шпанската јавност и особено навивачите на Реал.
